نیو یارک سٹی۔28دسمبر(اے پی پی) وزیر خارجہ بلاول بھٹو زرداری آکھیے ترقی پذیر ملکاں نومبر اچ شرم الشیخ اچ اقوام متحدہ دی موسمیاتی تبدیلی کانفرنس کاپ-27 اچ موسمیاتی آفات دے متاثرین دی مدد کیتے “ضیاع اور نقصان” فنڈ دے قیام دے ذریعے تاریخ رقم کیتی، اے اہم پیشرفت اے جیڑھی دولت مند ملکاں دی حوصلہ افزائی کریندی اے جو او آب و ہوا دے بحران نال نبڑدے ترقی پذیر ملکان کوں مالی امداد ݙیون، اینکوں دنیا اچ ھک تاریخی فتح دے طور تے منیا ڳئے جیڑھا جو ݙھاکیں دی طویل جدوجہد دا نتیجہ اے۔اپݨے اڄوکے دورہ امریکہ اچ ’’عرب نیوز ‘‘کوں ݙتے ڳئے ھک خصوصی انٹرویو اچ انہاں آکھیے میکوں ایں تے فخر اے جو پاکستان دی جی۔ 77 دی سربراہی اچ اساں ایں مقصد کوں حاصل کرݨ اچ کامیاب تھیوں ، پاکستان 134 ترقی پذیر ملکاں دے گروپ جی-77 دے 2022 کیتے سربراہ دی حیثیت نال ترقی پذیر دنیا دی موسمیاتی امداد کیتے عالمی جدوجہد دی قیادت کیتی اے ۔ انہاں اچوں ٻہوں سارے ملکاں عالمی سطح تے گرین ہاؤس گیساں دے اخراج اچ نسبتاً گھٹ حصہ پیندن ، ول وی او خود اکثر آب و ہوا دی تباہ کاریاں دے ساریں توں ودھ خطرے دی وٹھ اچ آندن ۔ وزیر خارجہ آکھیے پاکستان کاپ-27 توں پہلے سربراہی اجلاس دے ایجنڈے اچ “ضیاع اور نقصان” دے مسئلے کوں رلاوݨ اچ کامیابی حاصل کیتی، اے کوئی سوکھا کم نہ ہئی ، موسمیاتی تبدیلیاں دے اثرات نال نبݨݨ کیتے ترقی یافتہ ملکاں کوں ترقی پذیر دنیا کوں معاوضہ ݙیوݨ دی لوڑھ اے ۔ ایں توں انڄ ھک زیادہ عملی اتے حقیقت پسندانہ نقطہ نظر دے طور تے اساکوں رل تے کم کرݨا اے ۔ وزیر خارجہ آکھیے عالمی جنوب اتے عالمی شمال کوں رل تے کم کرݨا ہوسی ، آب و ہوا دا انصاف اتے آب و ہوا تے مبنی تباہی دی کوئی سرحد نی ہوندی اینکوں پرواہ کائنی جو تساں امیر ہیوے یا غریب، بھاویں تساں موسمیاتی تبدیلی اچ ٻہوں زیادہ حصہ پاتے یا تسں ایویں نی کیتا ۔ انہاں پاکستان سودھے مختلف ملکاں اچ قدرتی آفات پاروں تباہ کاریاں دا حوالہ ݙیندے ہوئیں آکھیے اساکوں ایں مسئلے نال نبݨݨ کیتے رل تے کرݨا ہوسی ۔ وزیر خارجہ آکھیے موسمیاتی تبدیلیاں دے اسباب دے حوالے نال مختلف نقطہ نظر ہن ، ترقی پذیر دنیا دا موقف اے موسمیاتی تبدیلیاں دا سبب بݨݨ آلی گرین ہائوس گیساں دے اخراج اچ انہاں دا حصہ ٻہوں گھٹ اے ۔ انہاں آکھیے کوویڈ-19 دی وبا اتے یوکرین دی جنگ سودھے ٻئے عوامل دے نتیجے اچ اساں پائیدار ترقیاتی اہداف تے ضروری پیشرفت نی کرسڳدے ، جے اساں ایں مقصد کوں حاصل کرݨ چاہندوں تاں ایں کیتے پرجوش اصلاحاتی ایجنڈے دی لوڑھ اے ،ایں حوالے نال اقوام متحدہ دے سیکرٹری جنرل انتونیو گوتیرس دی تجاویز دی توثیق دی لوڑھ اے جیڑھی جو بین الاقوامی مالیاتی اداریں اچ اصلاحات دا وی مطالبہ کریندن تاں جو اساں پائیدار ترقیاتی اہداف حاصل کرݨ دے قابل تھی سڳوں۔
