اسلام آباد۔1دسمبر(اے پی پی) وزیراعظم محمد شہباز شریف آکھیے جو پاکستان شرم الشیخ کانفرنس اچ آفات توں تھیوݨ آلے ضیان دے ایجنڈا کوں موثر طریقے نال اجاگر کیتے جیں دے نتیجے اچ لاس اینڈ ڈیمیج فنڈ دا قیام عمل اچ آیا ،اے ھک تاریخی اقدام اے ،پاکستان دا مقدمہ موسمیاتی انصاف اے خیرات کائنی ، ترقی یافتہ ملکاں دی طرفوں ماحولیاتی تبدیلیاں دے چیلنج کوں قبول کرݨ خوش آئند اے تاں جو اساں ایں ضمن اچ کیتے ڳئے وعدیں کوں عملی شکل ݙیوݨ ضروری ہوسی ۔او شرم الشیخ اچ تھیوݨ آلی کاپ 27 کانفرنس دے دوران پاکستان دی کامیاب موسمیاتی سفارتکاری تے متعلقہ اداریں تے بین الاقوامی شراکت داراں دیاں کوششاں دی تعریف کرݨ کیتے خمیس کوں اتھاں منعقدہ تقریب توں خطاب کریندے پئے ہن ۔وزیراعظم شہباز شریف آکھیے جو پاکستان کوں اڄوکے سیلاب توں ٻہوں ضیان تھئے ،33 ملین لوک متاثر تھئن ، 1800 اموات تھئن جݙاں جو زراعت ،صنعت ، لائیو سٹاک ، انفراسٹرکچر سودھے 30 ارب ڈالر دے ضیان دا تخمینہ لاتا ڳئے ۔ انہاں آکھیے جو پاکستان دے سیلاب متاثرین دی مدد کرݨ آلے سارے ملکاں دا شکریہ ادا کریندوں ،اوکھے ویلھے اچ کیتی ونڄݨ آلی مدد ہمیشہ یاد رکھی ویسی ۔ وزیراعظم آکھیے جو پاکستان دے اندر وی مخیر حضرات اتے فلاحی اداریں متاثرین دی دل کھول تے مدد کیتی ایں طرح ساریاں صوبائی حکومتاں با لخصوص سندھ اتے بلوچستان دیاں حکومتاں متاثرین دی بھرپور مدد کیتی ۔انہاں نیشنل ڈیزاسٹر منیجمنٹ اتھارٹی تے ڈیزاسٹر منیجمنٹ دے صوبائی اداریں دیاں کوششاں دی وی تعریف کیتی ۔ انہاں آکھیے وزیر خارجہ بلاول بھٹو ، وزیر موسمیاتی تبدیلی شیری رحمان اتے وزیر اطلاعات مریم اورنگزیب کاپ 27 دے عالمی فورم تے پاکستان دا موقف اجاگر کرݨ اچ وی بھرپور کردار ادا کیتے ۔ انہاں آکھیے موسمیاتی تبدیلی پاروں مینھ توں پاکستان اچ بے پناہ تباہی تھئی اے حالانکہ موسمیاتی تبدیلیاں دا سبب بݨݨ آلیاں گیساں دے اخراج اچ پاکستان دا حصہ ھک فیصد توں وی گھٹ اے ،ساݙی خواہش اتے دعا اے جو جیڑھا کجھ پاکستان اچ تھئے او کہیں ݙوجھے ملک اچ نہ تھیوے تاں جو اے تلخ حقیقت اے جو موسمیاتی تبدیلیاں دے اثرات اتے انہاں دے نتیجے اچ رونما تھیوݨ آلیاں آفتاں سرحداں دی پابند کائنی۔ وزیراعظم شہباز شریف آکھیے جو اے پہلی واری تھئے جو پاکستان دی آواز عالمی سطح تے سݨی ڳئی تے انہاں کوششاں دی بدولت لاس اینڈ ڈیمج فنڈ دا قیام عمل اچ آیا ایں حوالے نال وزیر خارجہ بلاول بھٹو اتے وزیر ماحولیاتی تبدیلی شیری رحمان دا کردار قابل قدر اے ۔ انہاں آکھیے جو پاکستان دا مقدمہ موسمیاتی انصاف اے خیرات کائنی۔ انہاں آکھیے اے ڳالھ ٻہوں چنڳی اے جو ترقی یافتہ دنیا موسمیاتی تبدیلی دے چیلنج دی اہمیت کوں منیے تے شرم الشیخ اچ شاندار معاہدہ طے پاتے جئیں دے نتیجے اچ لاس اینڈ ڈیمج فنڈ دا قیام عمل اچ گھن آیا ڳئے تاں جو معاہدیں تے عمل درآمد دی زیادہ اہمیت ہوسی ۔ ایں موقع تے وزیراعظم شرم الشیخ کانفرنس اچ کامیاب سفارتکاری تے متعلقہ وزارتاں دے حکام دیاں کوششاں دی تعریف کیتی ۔ایندے توں پہلے تقریب توں خطاب کریندے ہوئیں وفاقی وزیر موسمیاتی تبدیلی شیری رحمان آکھیے جو کوپ 27 اچ کامیاب سفارتکاری تے سارے سٹیک ہولڈرز دا شکریہ ادا کریندوں ، وزیراعظم دی قیادت اتے راہنمائی اچ سارا کجھ ممکمن تھی سڳیے ۔
