اسلام آباد۔13ستمبر (اے پی پی):سپیکرقومی اسمبلی راجہ پرویز اشرف آکھیے جو گلوبل وارمنگ عالمی مسئلہ اے اتے ایندا عالمی سطح تے ہی نوٹس ڳھدا ونڄݨا چاہیدے ،پاکستان سودھے ترقی پذیرملکاں اچ موسمیاتی تبدیلیاں دے اثرات توں انسانی زندگیاں کوں شدید خطرہ اے ، جنہاں ملکاں دا عالمی درجہ حرارت اچ ودھارے دا باعث بݨݨ آلیاں گیساں دے اخراج اچ وݙا حصہ اے انہاں کوں ایں سلسلے اچ آپݨے نظام تے ݙوجھی نظر پاوݨی چاہیدی اے ، جے دنیا گلوبل وارمنگ دے معاملے تے قابو پاوݨ کیتے موثر اقدامات نہ چاتے تاں صورتحال قابو توں ٻاہر تھی ویسی ،پاکستان قصور وار نہ ہووݨ دے باوجود اڄوکے سیلاباں تے مینھ توں تھیوݨ آلی تباہی دی صورت اچ ھک باری قیمت ادا کیتی اے ، عالمی برادری ایں صورتحال دا ادراک کرے۔ٻدھ کوں پارلیمنٹ ہائوس اچ بین الپارلیمانی یونین دے ایشیا پیسیفک دے ریجن دے تریجھے سیمینار دے افتتاحی اجلاس توں خطاب کریندے ہوئیں انہاں ایشیائی ملکاں توں تعلق رکھݨ آلے سارے پارلیمنٹیرینز کوں خوش آمدید آکھدے ہوئیں آکھیے جو سیمینارپاکستان دی قومی اسمبلی اتے ہزاریہ ترقیاتی اہداف دے حصول کیتے قائم پارلیمانی ٹاسک فورس دیاں ودھ ساریاں کوششاں توں منعقد کیتا ڳئے ۔ انہاں بین الپارلیمانی یونین دے صدر و رٹے پچیکو اتے آئی پی یو دی پوری ٹیم دا وی شکریہ ادا کیتے۔ انہاں آکھیے جو بین الپارلیمانی یونین 1989 اچ بݨی، اے ادارہ عالمی پارلیمانی برادری دا ھک اہم فورم اے جیڑھا جو دنیا اچ موثر جمہوری نظام کیتے آپݨا کردار ادا کریندا پئے ، انہاں آکھیے ایں سیمینار اچ ایشیا پیسیفک خطے توں تعلق رکھݨ آلے پارلیمنٹیرینز اتے مندوبین کوں خطے اچ چیلنجزدے تناظراچ جامع ترقی دے تصورجیہے موضوعات تے غورو فکر کرݨ اچ مدد مل ویسی انہاں آکھیے موسمیاتی تبدیلی، بھک تے غذائیت دی کمی نینگراں کیتے معیاری تعلیم تے سارے طبقات تئیں صحت دیاں مساوی سہولتاں ݙیوݨ کوں یقینی بݨاوݨ جیہے مسئلیں دے حوالے نال سارے پارلیمنٹیرینز کوں موثر قانون سازی تے ٻئے اہم اقدامات چاوݨ کیتے لائحہ عمل مرتب کرݨا چاہیدے۔ انہاں آکھیے اے سیمیناراساکوں 2030 تئیں ہزاریہ ترقیاتی اہداف کوں گھنݨ کیتے قومی اتےعلاقائی حکمت عملیاں دا نویں سروں جائزہ گھنݨ دا ھک وختی موقع ݙیندے ، انہاں آکھیے جو کووڈ19 جیہی وبا پاروں پاکستان سودھے ٻئے ترقی پذیرملکاں کوں وݙے سماجی و اقتصادی جھٹکے دا سامݨا کرݨا پئے ۔ انہاں آکھیے ایں توں بعد موسمیاتی تبدیلی دے منفی اثرات توں متاثر تھی تے مختلف خطیں اچ شدید خشک سالی دی صورتحال تے کجھ خطیں اچ ودھ سارے مینھ تے سیلاب دی صورتحال دا سامݨا اے۔ انہاں آکھیے جو پاکستان ایشیا پیسیفک ملکاں کیتے اہم سیمینار دی میزبانی ھک نازک موڑ تے کریندا پئے کیوں جو صرف کجھ ݙینھ پہلے ساݙے شمالی پہاڑاں اچ ساوݨ دے ودھ سارے مینھ تے گلیشیئرز دے پگھلݨ دی وجہ توں سیلاب آیا جیں توں 1300 توں ودھ لوک جاں بحق تھئن 33 ملین بے گھر تھئن تقریباً30 ارب ڈالر مالیت دے مکان، سڑکاں، ریلوے دا نظام ، پل ، مال ڈھور تے فصلاں دا ضیان تھئے ، انہاں سیمینار دے سارے شرکا توں گزارش کیتی جو او انسانی سلامتی کیتے سنگین عالمی موسمیاتی تبدیلی دے چیلنج تے آپݨی توجہ ݙیون ، انہاں آکھیے جو موسمیاتی تبدیلیاں پوری دنیا اچ تباہی مچیندیاں پئن یورپ 500 سالاں اچ آپݨی بدترین خشک سالی دا سامݨا کریندا پئے ، چین کوں گرمی دی غیرمعمولی لہر دا سامݨا اے جیں توں دریا تے جھیلاں سک ڳئن ھک امریکی ریاست دے شہریاں کوں آکھیا ڳئے او گھر خالی کرݙیون کیوں جو اتھاں مزید سیلاب دا خطرہ اے،2021دا موسمیاتی تبدیلی دا رسک انڈیکس اے ظاہر کریندے جو عالمی کاربن دے اخراج اچ پاکستان دا حصہ ھک فیصد توں وی گھٹ اے ایندے باوجود موسمیاتی بحران دا ساریں توں ودھ خطرہ رکھݨ آلے ملکاں اچ پاکستان دا آٹھواں نمبر اے۔ انہاں آکھیے اقوام متحدہ دے سیکرٹری جنرل انتونیوگوتیرس دے اڄوکے دورہ پاکستان دے موقع تے انہاں سیلاب آلے علاقیں دا دورہ کیتے ، انہاں عالمی برادری کوں الویندے ہوئیں آکھیے جو اڄ پاکستان کوں ایں صورت حال دا سامݨا اے کل ایندی جاہ تے کوئی ٻیا ملک وی تھی سڳدے ، انہاں ایں موقع تے جی20ملکاں تے زورݙتے جو او آپݨے قومی گرین ہائوس گیساں دے اخراج اچ کمی دے اہداف اچ ودھارا کرن ۔ انہاں آکھیے جو اقوام متحدہ دے سیکرٹری جنرل پاکستان جیہے موسمیاتی خطرات توں ݙوچار ملکاں کیتے قرضیں توں نجات دے نویں طریقہ کار دے تعین دی لوڑھ تے زور ݙتے ۔
