اسلام آباد۔24نومبر(اے پی پی) وفاقی وزیر اطلاعات، نشریات و پارلیمانی امور مرتضی سولنگی آکھیے جومضر صحت پاݨی اتے چیزاں تیار کرݨ آلیں دے خلاف کاروائی کیتی ڳئی اے ، انسانی زندگیاں خطرے اچ پاوݨ آلیں کیتے 50 ہزار روپے جرمانہ تے ھک سال دی سزا گھٹ اے ۔سینیٹ اچ سینیٹر مشتاق احمد اتے سینیٹر نزہت صادق دے سوال دے جواب اچ مرتضی سولنگی آکھیے ھک سرکاری ادارے کوں کرپشن دا گڑھ آکھݨ قابل افسوس اے ، قائداعظم محمد علی جناح دی 11 اگست 1947ءدی پہلی تقریر توں گھن تے ہݨ تئیں ساݙی تقریر اچ کرپشن دا معاملہ ضرور شامل رہیے ، فاضل سینیٹر کنے ایں ادارے بارے کرپشن دے شواہد ہن تاں ضرور ݙساون ، متعلقہ اداریں توں تحقیقات کرویسوں ۔ نگران وفاقی وزیر آکھیے پی سی آر ڈبلیو آر اپݨی ترائے مہینے دے رپورٹ اپریل توں جون 2022ء اچ پاݨی دے 20 برانڈز کوں مضر صحت قرار ݙتا ہئی ، انہاں توں ݙو برانڈز ایجھے ہن جیڑھے جو پی ایس کیو سی اے دے تحت رجسٹرڈ ہن، لائسنس یافتہ انہاں ݙو برانڈز دے خلاف ایکشن ڳھدا ڳئے انہاں دی پروڈکشن بند کیتی ڳئی ، جݙاں تئیں انہاں برانڈز دی پراڈکٹس معیار تے پوریاں نی لتھاں او تئیں انہاں کوں کھولیا نی ڳیا ، باقی 18 برانڈ رجسٹرڈ کائنی ۔ انہاں آکھیے ٻہوں سارے گروہ ایہو سویاں مضر صحت چیزاں تیار کریندن انہاں دے خلاف ایکشن ڳھدا ڳئے ، پی ایس کیو سی اے دے قانون موجب غیر لائسنس یافتہ لوکاں کوں 50 ہزار روپے جرمانہ اتے ھک سال دی سزا عدالت دے ذریعے ݙتی ویندی اے جنھاں کوں گرفتار کیتا ڳئے انہاں کوں سزا ݙتی ڳئی اے ۔ انہاں آکھیے 50 ہزار روپے جرمانہ اتے ھک سال دی سزا ٻہوں گھٹ اے اے لوک انسانی زندگی کوں خطرے اچ پیندے پئن ۔ نگران وفاقی وزیر آکھیے اے سوال عوامی اہمیت دا اے۔
