اسلام آباد۔6دسمبر (اے پی پی) نگران وزیراعظم انوار الحق کاکڑ آکھیا جو عام انتخابات 8 فروری کوں کراوݨ بارے کوئی شکوک و شبہات نی ہووݨے چاہیدے، نو مئی دے بعد ریاستی جبر دا کوئی سامݨے نی آیا، اے صرف الزام اے۔ نگران حکومت قومی معیشت بہتر ٻݨاوݨ کیتے محدود مینڈیٹ اچ رہندیں ہوئیں جو تھی سڳدے کریندی پئی اے۔ باقی کم آندی حکومت کریسی۔ اے ڳالھیں انہاں “انڈپینڈنٹ اردو “کوں ݙتے ڳئے خصوصی انٹرویو اچ آکھی۔ انتخابات بارے ہک سوال دے ولدے اچ انہاں آکھیا جو میکوں یقین اے جو اٹھ فروری کوں ملک اچ انتخابات تھیسن۔ وزیراعظم توقع کیتی جو آندے عام انتخابات آزادانہ ہوسن، اساں الیکشن کراوݨ کیتے الیکشن کمیشن دے نال ہیسے۔ ہک ٻئے سوال دے ولدے اچ وزیراعظم آکھیا جو لوک مختلف سیاسی تجزیے پیش کریندے رہندن، کیڑھے رہنما دی مقبولیت کتنی اے ایندا اندازہ انتخابات اچ تھی ویسی۔ سابق وزیراعظم عمران خان اتے اوندی جماعت دے انتخابات اچ حصہ ڳھنݨ تے پابندی بارے سوال دے ولدے اچ وزیراعظم آکھیا جو اڄاں تئیں انہاں تے کوئی قدغن کائنی۔ مستقبل اچ کیا صورتحال ہوسی ایں بارے او کجھ نی آکھ سڳدے۔ پی ٹی آئی رہنماواں دی مبینہ گمشدگیاں ، منظر عام تے آوݨ اتے سیاست چھوڑم دے اعلانات بارے سوال دے ولدے اچ انہاں آکھیا جو نو مئی کوں ریاستی اداریاں تے حملے تھیے جئیں دے بعد کئی لوک لُک ڳئے، ایں وچال سوچ وچار کر تے پی ٹی آئی یا سیاست توں انج تھیوݨ انہاں دا ذاتی فیصلہ اے۔
