اسلام آباد۔25اگست (اے پی پی):وفاقی وزیر اطلاعات و نشریات مریم اورنگزیب سیلابی صورت حال کوں قومی ایمرجنسی قرار ݙیندے ہوئیں آکھیے جو صوبہ سندھ تے بلوچستان اچ غیرمعمولی تباہی دی صورتحال نال نبݨݨ کیتے قومی جذہ ݙکھاوݨا ہوسی ،متاثرین سیلاب دی مدد کیتے پوری قوم خاص طور تے ٻاہرلے ملک پاکستانیاں دے عطیات دی لوڑھ اے، خمیس کوں آپݨے ھک بیان اچ وزیر اطلاعات مریم اورنگزیب آکھیے جو ٻہوں وݙے پیمانے تے تھیوݨ آلی تباہی دی وجہ توں خطیر رقم درکار ہوسی ،وفاقی حکومت، صوبیں نال رل تے بھرپور کوششاں کریندی پئی اے وسائل کوں موبلائز کیتا ویندا پئے ، ودھ سارے مینھ وسݨ تے شدید سیلابی ریلے دی وجہ توں ریلیف دے کماں اچ اوکھ تھیندی پئی اے ۔عوام دی مدد نال متاثرین دے ریسکیو اتے ریلیف دے عمل کوں تکھا کیتا ونڄ سڳدے ۔ انہاں آکھیے جووزیراعظم فلڈ ریلیف اکاؤنٹ 2022 اچ عطیات جمع کراوݨ دی تفصیلات پہلے ہی جاری کرݙتی ڳئی اے ۔اندرلے تے ٻاہرلے ملک پاکستانی عطیات اکاؤنٹ (Prime Minister Relief Fund Account 2022 Account No. ‘G-12164) اچ جمع کرا سڳدن ۔وزیر اطلاعات مریم اورنگزیب آکھیے جو مصیبت اچ پتھے اہل وطن ساݙی مدد دے منتظر ہن، آؤ اساں سارے بݨوں سہارا،ٻاہرلے ملک پاکستانی وائر ٹرانسفر، منی سروس بیوروز، منی ٹرانسفر آپریٹرز اتے ایکسچینج ہاؤسز دے ذریعے وی عطیات بھجوا سڳدن۔عطیات سارے کمرشل بینکاں اچ نقد وی جمع کرائے ونڄ سڳدن۔ انہاں آکھیے جو بینکاں دے ڈراپ باکس اچ کراس چیک، موبائل اتے انٹرنیٹ بینکنگ، اے ٹی ایمز، اے بی ایف ٹی، راست دے ذریعے وی جمع کروائے ونڄ سڳدن ۔
