اسلام آباد۔14دسمبر(اے پی پی):تاجکستان دے صدر امام علی رحمان بدھ کوں ݙو ݙینھ دے دورے تے پاکستان پڄ ڳئن ۔ اسلام آباد انٹر نیشنل ایئر پورٹ تے وفاقی وزیرتجارت سید نوید قمر پاکستان پڄݨ تے تاجکستان دے صدر امام علی رحمان دا پرتپاک استقبال کیتا۔ ایں موقع تے انہاں کوں 21 توپاں دی سلامی ݙتی ڳئی تے روایتی لباس پاتے ٻالاں گلدستے پیش کیتے۔ انہاں کوں دورے دی دعوت وزیراعظم محمد شہبازشریف ݙتی ہئی۔ تاجک صدر دورے دے دوران مختلف شعبیں اچ ݙو پاسے تعاون کوں مزید مضبوط بݨاوݨ تے ڳالھ مہاڑ کریسن ۔ انہاں دے دورے اچ کئی ݙوپاسے معاہدیں اتے مفاہمت دیاں یادداشتاں تے دستخط تھیوݨ دی توقع اے۔ پاکستان اتے تاجکستان پراݨے تاریخی، ثقافتی اتے مذہبی رشتے اچ گھنڈیے بھرا ملک ہن ۔ اے تعلقات سانجھے احترام تے غیر معمولی ہم آہنگی اتے ہن ۔ مختلف علاقائی اتے بین الاقوامی مسئلیں تے ݙوہیں ملکاں دی ھکو سویں سوچ اے ۔تاجکستان وسطی ایشیا اچ پاکستان دا ساریں توں نیڑے ہمسایہ اے جیں کوں صرف تنگ واخان راہداری توں انڄ کرݙتا ڳئے ۔ اے قربت تاجکستان کوں وسطی ایشیا اچ پاکستان دا ھک اہم شراکت دار بݨیندی اے ۔ توقع اے جو تاجک صدر دے دورہ پاکستان نال ݙوہی ملکاں وچال مختلف شعبیں اچ تعاون کوں مزیدودھاوݨ تے ودھدی جیو اکنامک پارٹنرشپ بئی تکڑی تھیسی۔
