اسلام آباد۔22اپریل (اے پی پی):وفاقی کابینہ اچ توسیع کرݙتی ڳئی اے ، کابینہ اچ مزید 4 ارکان شامل کیتے ڳئن جنہاں جمعے کوں ایوان صدر اچ منعقدہ ھک سادہ تے پروقار تقریب اچ حلف چا ڳھدے ۔ صدر مملکت ڈاکٹر عارف علوی نویں وفاقی وزراءاتے وزراءمملکت توں حلف ڳھدا ۔ حلف برداری دی تقریب اچ وزیراعظم محمد شہباز شریف، سول و فوجی حکام، حکومت اچ شامل اتحادی جماعتاں دے رہنماواں اتے بئی اہم شخصیات شرکت کیتی۔ وفاقی کابینہ اچ جنہاں نویں وزراء کوں کابینہ اچ رلایا ڳئے انہاں اچ میاں جاوید لطیف، آغا حسن بلوچ اتے چوہدری سالک حسین کوں وفاقی وزیر بݨِایا ڳئے جݙاں جو محمد ہاشم نوتیزئی کوں وزیر مملکت دی حیثیت نال کابینہ اچ رلایا ڳئے ، ایں توں پہلے 19 اپریل کوں پہلے مرحلے اچ کابینہ اچ 30 وفاقی وزراء اتے 3 وزراء مملکت کوں رلایا ڳیا ہئی ۔ کابینہ اچ پہلے ہی 3 مشیراں کوں وی رلایا ڳئے ۔
