لاہور۔7مارچ(اے پی پی):وزیراعظم محمد شہباز شریف دی ہدایت تے حکومت پنجاب مہانگ دے ستائے عوام کیتے وݙا رمضان پیکج تیار کیتے جیں دے تحت غریب گھراݨیں کوں مفت اٹا ݙتا ویسی ۔ اے فیصلہ منڳل کوں وزیراعظم دی زیر صدارت پنجاب اچ رمضان پیکج دے تحت مفت اٹے دی فراہمی دے جائزہ اجلاس اچ کیتا ڳئے ۔پہلی واری غریب گھراݨیں کوں مفت اٹے دی فراہمی دا اے اپݨی نوعیت دا پہلا پیکج اے جیڑھا جو وزیراعظم دی خصوصی ہدایت تے تیار کیتا ڳئے ۔ پہلے مرحلے اچ صوبہ پنجاب اچ غریب لوکاں کوں خصوصی رمضان پیکج دے تحت مفت اٹا ݙتا ویسی ۔ وزیراعظم غریب گھراݨیں کوں رمضان پیکج دے تحت اٹے دی فراہمی تے جامع حکمت عملی وختی مکمل کرݨ دی ہدایت کریندے ہوئیں آکھیے ماہ رمضان اچ روزہ داراں کوں ودھ توں ودھ ریلیف ݙتا ونڄے۔ وزیراعظم دی ہدایت تے پنجاب ماڈل دی طرز تے پورے ملک اچ رمضان پیکج دی غریب عوام کوں فراہمی کیتے وفاق صوبیں کوں ہر ممکن تعاون ݙیسی ۔ اجلاس اچ چیف سیکرٹری پنجاب زاہد اختر زمان اتے سیکرٹری خزانہ مجاہد شیر دل رمضان پیکج دے حوالے نال وزیر اعظم کوں بریفنگ ݙتی۔ نگران وزیراعلیٰ پنجاب سید محسن رضا نقوی دے علاوہ سیکرٹری فوڈ تے ٻئے اعلی حکام وی اجلاس اچ شریک تھئن ۔
