ملتان ۔13مئی(اے پی پی)وزیر خارجہ مخدوم شاہ محمود قریشی آکھیے جو پاکستانی قوم کشمیر اتے فلسطین دے مسئلہ تے ہک مٹھ اے، فلسطین دے معاملے تے مسلم امہ اچ اتفاق رائے دے بعد پاکستان اتے ترکی اقوام متحدہ دی جنرل اسمبلی دا اجلاس سݙاݨ کیتے تحریک پیش کرݨ دا فیصلہ کیتے۔ اے ڳالھ انہاں ملتان اچ نماز عید پڑھݨ توں بعد میݙیا نال الیندے آکھی۔ انہان مسجد اقصیٰ تے اسرائیلی حملیاں، غزہ دی پٹی اچ جاری اسرائیلی بمباری دی مذمت کریندے آکھیے جو فلسطین بارے وزیراعظم دی سعودی عرب دے شاہ سلمان اتے ترک صدر طیب اردگان نال ڳالھ مہاڑ تھئی اے، ساݙی ہکا حکمت عملی اے جو او آئی سی دا وزارتی اجلاس سݙیڄے اتے 57 مسلم ممالک کوں کٹھا کر تے مسئلہ فلسطین کوں اقوام متحدہ دی جنرل اسمبلی اچ ڳھن ونڄیڄے۔ انہاں آکھیا جو ایران نال تعلقات چنڳے ہین، پاک ایران سرحد محفوظ بݨاوݨ کیتے اتفاق رائے اے۔ انہاں آکھیا جو پاکستان افغانستان اچ امن چاہندے ایندے کیتے فریقاں کوں جنگ بندی تے عمل جاری رکھݨا ہوسی، ایندے نال لکھاں افغان مہاجرین باعزت ول ویسن۔ انہاں آکھیا جو یمن دے معاملے تے امریکی دی پالیسی اچ تبدیلی آئی اے، سعودی عرب اتے پاکستان رل تے کم کریسن۔
