اسلام آباد۔1اگست (اے پی پی) پاکستان بھارت دے غیر قانونی طور تے زیر قبضہ جموں تے کشمیر دی خصوصی حیثیت کوں ختم کرݨ تے غیر قانونی، غیر اخلاقی اتے غیر آئینی اقدام دی مذمت اتے بھارتی فوج دے محاصرے دے ترائے سال پورے تھیوݨ تے مقبوضہ کشمیر دی عوام یکجہتی کیتے پنڄ اگست کوں یوم استحصال منیسی۔ حکومت یوم استحصال دے موقع تے مظلوم کشمیریاں نال یکجہتی کیتے سیمینارز اتے کانفرنسز سودھے کئی پروگرام تھیسن اتے کشمیریاں دی حمایت کیتے پورے ملک اچ ریلیاں کݙھی ویسن۔ پوری قوم آپݨے کشمیری بھراواں کوں اے سنیھا ݙیسی جو پاکستانی عوام انہاں دی حق خودارادیت دی منصفانہ جدوجہد اتے بھارتی فوج دے مظالم دے خلاف ہمیشہ انہاں دے نال کھڑے رہسن۔ لائن آف کنٹرول دے ݙوہیں پاسوں اتے پوری دنیا اچ کشمیری وی پنڄ اگست 2019 دے بھارت دے غیر آئینی کم دی مذمت کیتے یوم استحصال منیسن۔ ملک دی ساری سیاسی جماعتاں دے کارکنان ریلیاں اتے ٻئی سرگرمیاں دے ذریعے مقبوضہ کشمیر دے معصوم اتے نہتے لوکاں دے خلاف بھارتی ریاستی دہشت گردی دے خلاف احتجاج ریکارڈ کرویسن۔
