اسلام آباد۔1فروری (اے پی پی) وزیرِ اعظم محمد شہباز شریف آکھیا جو چین پاکستان دا پراݨا دوست اے جئیں پاکستان دی ہر چنڳے مندے ویلھے مدد کیتی اے، پاکستان اتے چین دی سٹرٹیجک شراکت داری مثالی اے اتے چین نال سٹرٹیجک سانجھے داری کوں ٻیا مضبوط کرݨ چاہندوں، چین پاکستان اقتصادی راہداری دے تحت ارباں ڈالر دی سرمایہ کاری چینی حکومت اتے عوام دی پاکستان نال محبت دا منہ بلیندا ثبوت اے۔ اے ڳالھیں انہاں چائنا نیشنل نیوکلیئر کارپوریشن دے وفد نال ڳالھ مہاڑ کریندیں ہوئیں آکھی جئیں بدھ کوں انہاں نال ملاقات کیتی۔ وزیراعظم آکھیا جو او کل کراچی اچ چین دی شراکت نال تعمیر تھیے تھری نیوکلیئر پاور پلانٹ دا افتتاح کریسن، ایں منصوبے نال کراچی نیوکلیئر پاور پلانٹ توں بجلی دی مجموعی پیداوار 2200 میگاواٹ تھی ویسی۔ ملاقات اچ وائس چیئرمین چائنا اٹامک انرجی اتھارٹی (سی اے ای اے ) لیو جنگ ، پاکستان اچ چینی سفارتخانہ دی ناظم المور پانگ چُن شوئی اتے متعلقہ اعلیٰ چینی حکام شریک تھیے۔ ایں موقع تے وفاقی وزرا اسحاق ڈار، احسن اقبال، انجینئر خرم دستگیر، معاونینِ خصوصی طارق فاطمی، طارق باجوہ اتے متعلقہ حکام وی موجود ہن۔ ملاقات اچ وزیراعظم کوں چین دی پاکستان اچ نیوکلیئر انرجی دے منصوبیاں اچ سرمایہ کاری تے بریفنگ ݙتی ڳی۔
